Óskemende avtobýsta pnevmatıkalyq ballon jarylǵan soń qoǵamdyq kólikter aýystyrylmaq

ÓSKEMEN. KAZINFORM — Óskemendegi aıaldamalardyń birinde Volvo markaly avtobýstyń pnevmatıkalyq ballony jarylǵan oqıǵadan soń qoǵamdyq kólikterdi aýystyrý týraly sheshim qabyldandy.

Jarylǵan pnevmatıkalyq ballon synyqtarynan avtobýs kútip turǵan 63 jastaǵy áıel jaraqat alǵan bolatyn. Shyǵys Qazaqstan oblysy Polıtsııa departamentiniń málimetinshe, ol birden medıtsınalyq mekemege jetkizilgen.

— Atalǵan fakti boıynsha sotqa deıingi tergeý bastaldy. Birqatar saraptama taǵaıyndaldy. Sonyń qorytyndysy boıynsha protsessýaldyq sheshim qabyldanady, — delingen aqparatta.

Qala ákimi Almat Aqyshov osy oqıǵadan soń tıisti sharalar qabyldanatynyn jetkizdi.

— Osy baǵytta júretin avtobýstar aýystyrylady. Bul jaılylyq úshin ǵana emes, jolaýshylardyń qaýipsizdigine de qatysty ekenin túsinip otyrmyz, — dedi ol.

Eske salsaq, Óskemende poıyz ben avtobýs soqtyǵysa jazdaǵanyn jazǵanbyz.