Óskemende avtobýsta balanyń tegin júretin arnaıy kartasy bolmasa kondýktor ony túsirip tastaı ala ma

ÓSKEMEN. KAZINFORM — Óskemen qalasynda áleýmettik jeliler men messenjderlerde balanyń arnaıy kartasy bolmasa kondýktorlar ony túsirip tastaıtyndyǵy týraly aqparat tarap jatyr. Buǵan qatysty qala ákimdiginen jaýap berdi.

Búginde Óskemende 18 jasqa deıingi balalar avtobýsta tegin júredi. Alaıda ol úshin qoǵamdyq kólikke kirgende tıisti kartany elektrondy bıletteý júıesiniń valıdatoryna tıgizý kerek. Sonda balanyń avtobýsqa mingeni tirkelip, tasymaldaýshyǵa aqyny ákimdik tóleıdi.

— Eger balanyń qandaı da bir sebeppen balalarǵa arnalǵan kólik kartasy bolmasa onda tegin júrý úshin óziniń jasyn rastaıtyn qujatty kórsetýi tıis. Al mundaı qujat bolmaǵan jaǵdaıda, bala jolaqysyn tóleýge mindetti. Biraq qandaı jaǵdaı bolmasyn, zań boıynsha kondýktorlar men júrgizýshilerdiń balany nemese jasóspirimdi avtobýs pen tramvaıdan túsirýge quqyǵy joq, — delingen aqparatta.

Aıta keteıik, «Kólik týraly» zańda «ata-anasyz jáne (nemese) zańdy ókilinsiz júrgen, 16 jasqa tolmaǵan balany qoǵamdyq kólikten májbúrlep túsirýge tyıym salynady» dep jazylǵan.

Eske salsaq, osyǵan deıin Almatyda avtobýstyń terezesin syndyrǵan kúdikti ustalǵany habarlanǵan.