Óskemende avtobýs jolaqysyn kóterý bastamasy qoldaý tapty
ÓSKEMEN. KAZINFORM — Óskemen qalasynda qoǵamdyq kólik jolaqysy 1 qyrkúıekten bastap ózgerýi múmkin. Tarıfti qaıta qaraý jónindegi jobany Shyǵys Qazaqstan oblysynyń Qoǵamdyq keńesi qoldady.
Joba maquldanǵan jaǵdaıda qolma-qol aqshasyz tólem kezinde jolaqy qazirgi 90 teńgeniń ornyna — 120 teńge, al qolma-qol esep aıyrysqanda 130 teńgeniń ornyna — 200 teńge bolady.
Jıynda aıtylǵandaı, qoldanystaǵy tarıf tasymaldaýshylardyń shyǵyndaryn ótemeıdi. Óskemen qalalyq turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminiń málimetinshe, birneshe jyldan beri bul shyǵyn jergilikti bıýdjet esebinen sýbsıdııalanyp keldi.
— Qolma-qol aqshasyz tólemge arnalǵan tarıf saralanǵan tólem júıesi engizilgennen beri ózgergen joq. Osy ýaqyt ishinde janarmaı, qosalqy bólshekter, kólikke qyzmet kórsetý jáne basqa da shyǵyndar aıtarlyqtaı ósti. Qazirgi tańda tasymaldyń ekonomıkalyq turǵydan negizdelgen quny men qoldanystaǵy tarıf arasyndaǵy aıyrmashylyqty qalalyq bıýdjet ótep otyr. Alaıda bıýdjet qarajatynyń tapshylyǵy jaǵdaıynda mundaı júıeni saqtap qalý barǵan saıyn qıyndap barady, — deıdi bólim basshysy Erjan Ibraev.
Talqylaý barysynda Qoǵamdyq keńes múshelerine jolaýshylar tasymalynyń ózindik quny men kásiporyndarǵa jyl saıyn bólinetin bıýdjet sýbsıdııalarynyń kólemi tanystyryldy.
Jıyn qorytyndysy boıynsha Qoǵamdyq keńes usynylǵan ózgeristerdi qoldady.
Endi qaýly jobasy qoǵamdyq talqylaýǵa shyǵarylady. Ol 22 shildede «Ashyq NQA» portalynda jarııalanyp, turǵyndar óz usynystary men eskertýlerin joldaı alady. Osy rásim aıaqtalǵannan keıin jol júrý tarıfine qatysty túpkilikti sheshim qabyldanady.
Eske salsaq, osyǵan deıin Óskemende avtobýs jolaqysy qyrkúıekten bastap ózgerýi múmkindigi jaıly jazǵanbyz.
