Óskemende avtobýs jolaqysy qyrkúıekten bastap ózgerýi múmkin
ÓSKEMEN. KAZINFORM – Óskemen qalasynda qoǵamdyq kóliktegi jol júrý tarıfin segiz jyldan keıin alǵash ret qaıta qaraý usynyldy.
Tıisti qaýly jobasyn qalalyq turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bólimi jarııalady.
Jobaǵa sáıkes, 1 qyrkúıekten bastap qolma-qol aqshasyz tólem jasaǵan kezde bir jolaqynyń quny 90 teńgeden 120 teńgege deıin, al qolma-qol tólem kezinde 120 teńgeden 200 teńgege deıin ósýi múmkin.
Qujat qazirgi ýaqytta kelisý rásimderinen ótip jatyr jáne túpkilikti sheshim áli qabyldanǵan joq.
– Qaýly qabyldanyp, resmı jarııalanǵannan keıin ǵana jańa tarıfter zańdy kúshine enedi. Qazirgi tańda bul normatıvtik quqyqtyq aktiniń jobasy ǵana, – dep habarlady bólimnen.
Qala ákimdiginiń málimetinshe, tarıfti qaıta qaraý qajettiligi tasymaldaýshylardyń shyǵyndarynyń aıtarlyqtaı ósýine baılanysty týyndaǵan. Qoldanystaǵy jol júrý quny 2017 jyldan beri ózgergen joq. Osy ýaqyt ishinde janar-jaǵarmaı materıaldarynyń, qosalqy bólshekterdiń, shınalardyń, avtobýstarǵa tehnıkalyq qyzmet kórsetý shyǵyndarynyń baǵasy, júrgizýshilerdiń jalaqysy, salyqtar men basqa da mindetti tólemder mólsheri edáýir artqan.
– Tarıfti ózgertýdegi basty maqsat – jolaýshylarǵa qarjylyq salmaq túsirý emes, shyǵyndardyń ósýi jaǵdaıynda qoǵamdyq kóliktiń turaqty, qaýipsiz ári sapaly jumysyn qamtamasyz etý. Sonymen qatar bul avtobýs parkin kezeń-kezeńimen jańartýǵa múmkindik beredi, – dep málim etti Óskemen qalasy ákimdiginiń baspasóz qyzmetinen.
Eske salsaq, osyǵan deıin Almatyda toǵyz avtobýstyń qozǵalys syzbasy ýaqytsha ózgeretindigi habarlanǵan.
