Óskemende avtobýs jol belgisine soǵyldy
ASTANA. QazAqparat - Senbi kúni keshkisin Óskemendegi Kırov jáne Qabanbaı batyr kósheleriniń qıylysynda jol-kólik oqıǵasy boldy, dep habarlaıdy QazAqparat altaynews.kz-ke silteme jasap.
Saıabaqty betke ala jolaýshysyz kele jatqan avtobýs jol belgisin soqqan. Kýágerlerdiń aıtýynsha, ol Kırov kóshesiniń burylysynda jaıaýjolǵa shyǵyp ketken. Oǵan aýa raıy jaǵdaılary da sebep bolýy múmkin.
Oqıǵa ornynda jumys istep jatqan polıtseıler pikir bildirýden bas tartty. Eger kinási anyqtalsa, júrgizýshige sot sheshimimen aıyppul salynýy múmkin.
