Óskemende avtobýs pen KamAZ soqtyǵysyp, jolaýshylar zardap shekti

ÓSKEMEN. QazAqparat – Óskemen qalasynda avtobýs pen KamAZ soqtyǵysyp, jolaýshylar zardap shekti, dep habarlaıdy QazAqparat tilshisi.

ShQO Polıtsııa departamenti baspasóz qyzmetiniń málimetine súıensek, jol-kólik oqıǵasy Toǵas kóshesinde bolǵan. Jolaýshy tasymaldap kele jatqan avtobýs pen KamAZ soqtyǵysyp qaldy.

«62 jastaǵy avtobýs júrgizýshisi qosalqy joldan negizgi jolǵa shyǵyp bara jatyp manevrdiń qaýipsizdigine kóz jetkizbegen. Sonyń saldarynan negizgi jolda kele jatqan KamAZ-ben soqtyǵysty. Jol apatynan qoǵamdyq kóliktegi 2 jolaýshy zardap shekti. Jedel járdem qyzmetkerleri olarǵa alǵashqy kómek kórsetti», - delingen aqparatta.

Polıtsııa qyzmetkerleri avtobýs júrgizýshisine qatysty ákimshilik hattama toltyrdy.

Eske salsaq, keshe Óskemende avtobýs jer úıge soǵylǵanyn habarlaǵan edik.