Óskemende avtobýs parkin jańartý kózdelýde
ÓSKEMEN. QazAqparat – Shyǵys Qazaqstan oblysynyń ákimi Danıal Ahmetov Óskemen qalasynda jolaýshy tasymalymen aınalysatyn kompanııa ókilderimen kezdesti, dep habarlaıdy QazAqparat tilshisi.
ShQO ákimi baspasóz qyzmetiniń málimetine súıensek, Óskemendegi tramvaı jáne avtobýs parkteriniń ókilderi Qazaqstannyń basqa qalalarynda engizilgen elektrondy bıletteý máselesin kótergen. Bul júıe jolaýshylar tasymaly salasynyń ashyqtyǵyn qamtamasyz etýge múmkindik beredi. Ásirese, avtobýs ıelerimen yntymaqtasa jumys isteıtin jergilikti avtoparkter úshin ózekti ári tıimdi bolmaq.
«Sondaı-aq kezdesýge qatysýshylar sýbsıdııalaý máselelerin talqylady. Tasymaldaýshylardyń aıtýynsha, elektrondy bıletteý júıesi jeńildetilgen sanattaǵy jolaýshylardyń naqty sanyn kórsete alady. Alynǵan málimetter bólingen sýbsıdııalardyń mólsherin de dál esepteýge jaǵdaı jasamaq», - delingen aqparatta.
Taǵy bir mańyzdy másele – avtobýs parkin jańartý bolyp otyr. Jańa kólik satyp alǵannyń paıdasy kóp. Ol jolaýshylarǵa jaıly, marshrýttarǵa qyzmet kórsetýge arnalǵan konkýrs sharttarynyń saqtalýyn jáne eń bastysy jolaýshylardyń qaýipsizdigin qamtamasyz etedi. Óskemendegi keıbir kompanııalar tehnıkany lızıngke alýǵa nıetti, onyń ústine memleket pen Eýropalyq qaıta qurý jáne damý banki qoldaý kórsetýge daıyn.
«Kezdesý qorytyndysy boıynsha birqatar kelisimge qol jetkizildi. Atap aıtqanda, tasymaldaýshylar óz salasyn damytý josparyn jasap, basqa máselelerden bólek baǵyttardy ózgertý jóninde usynystaryn daıyndaıdy. Sonymen qatar avtoparkterdiń jyljymaly quramyn jańartý mehanızmderi engiziletin bolady. Endi kelesi kezdesý eki aıdan keıin ótpek», - delingen habarlamada.
