Óskemende aýyl ákimderiniń tuńǵysh respýblıkalyq forýmy ótýde

ÓSKEMEN. QazAqparat - Búgin Óskemende bastalǵan aýyl ákimderiniń birinshi respýblıkalyq forýmyna Shyǵys Qazaqstan men Pavlodar oblystarynan 500-den astam aýyl ákimi qatysyp jatyr. Bul týraly «QazAqparat» HAA tilshisi habarlady.

Ulttyq ekonomıka mınıstri Tımýr Súleımenov 2018 jyldyń 1 qańtarynan bastap 2 myńnan astam turǵyny bar 1066 eldimekenniń óz bıýdjeti bolatynyn eske salyp ótti. Memlekettik bıýdjettiń 4-shi deńgeıi retinde aýdandyq mańyzy bar qalanyń, aýyldyń, kenttiń, aýyldyq okrýgtiń deńgeıinde jergilikti ózin-ózi basqarý bıýdjeti engiziledi. Al 2020 jyldan bastap Qazaqstannyń barlyq 2444 ákimshilik-aýmaqtyq birligine derbes bıýdjet engiziledi.

Sondaı-aq, forýmda aqparattyq júıeniń bıýdjettiń tórtinshi deńgeıin iske asyrýǵa daıyndyǵy, halyqty jergilikti deńgeıde bıýdjettik protseske tartý, aýyldyq okrýgterde jergilikti ózin-ózi basqarýdyń kommýnaldyq menshigine jetekshilik etý jáne taǵy basqa máseleler aıtyldy.

Shyn máninde, Elbasynyń aýyldyq okrýgterdiń deńgeıinde jergilikti ózin-ózi basqarýdyń derbes bıýdjetin engizý týraly «Bes ınstıtýtsıonaldyq reformany júzege asyrýdyń 100 naqty qadamy» Ult josparynyń 98-inshi qadamyn júzege asyrýǵa az ǵana ýaqyt qaldy.

Aıta keteıik, eldiń shyǵysynda kelesi jyldyń qańtarynan bastap 100 ákimshilik aýmaqtyqta jergilikti ózin-ózi basqarýdyń derbes bıýdjetin engizý josparlanyp otyr.