Óskemende aýrýhanada jatqan naýqas terezeden sekirip kóz jumdy

ÓSKEMEN. KAZINFORM — Óskemen qalasynda aýrýhanada altynshy qabattaǵy terezeden sekirip ketken naýqas qaza boldy.

Oqıǵa búgin № 4 qalalyq aýrýhanada boldy. 56 jastaǵy azamat altynshy qabattaǵy bólmeniń terezesinen sekirip ketken. 

«Naýqas psıhomotorly qozý jaǵdaıynda bolǵan. Qasyndaǵy medbıke er adamdy ustaı almaı qaldy. Qulap ketken ol sol jerde kóz jumdy» dep habarlady ShQO densaýlyq saqtaý basqarmasynyń baspasóz qyzmetinen.

Patsıent tynys alý joldarynyń aýrýymen jansaqtaý bólimine túsken.

Osy jaǵdaıǵa baılanysty medıtsınalyq mekeme basshylyǵy qyzmettik tekserý júrgizdi. 

«Sonyń qorytyndysynda medıtsına qyzmetkerleriniń jumysynda eshqandaı buzýshylyq bolmaǵany anyqtaldy. Qazirgi ýaqytta sondaǵy patsıenttermen jáne aýrýhananyń eńbek ujymymen psıholog jumys istep jatyr. Quqyq qorǵaý organdary barlyq mán-jaıdy anyqtap jatyr» delingen aqparatta.