Óskemende aýrýhanada jatqan naýqas dárigerdiń ózin soqqyǵa jyqqanyn aıtyp, aryz jazdy

ÓSKEMEN. KAZINFORM — Óskemen qalasynyń turǵyny dárigerdiń ózine kúsh qoldanǵanyn aıtyp, polıtsııaǵa aryz túsirdi.

Bul týraly jábirlenýshiniń aǵasy áleýmettik jelige jazǵan. Onyń sózinshe, baýyry aýrýhanada emdelip jatqanda medıtsınalyq mekeme qyzmetkeri ony soqqyǵa jyqqan. Sonyń saldarynan er adamnyń beti, arqasy men beline zaqym kelgen.

Kazinform tilshisi oqıǵanyń aq-qarasyn bilý úshin ShQO Polıtsııa departamentine habarlasyp kórdi. Departamenttiń baspasóz qyzmeti qazir tergeý júrgizilip jatqanyn, biraq jábirlenýshige naqty aýrýhanada dene jaraqaty keltirildi degen aqparat áli naqtylanbaǵanyn málim etti. 

— Atalǵan fakti boıynsha polıtsııa qylmystyq is qozǵady. Tıisti saraptamalar taǵaıyndaldy. Ózge aqparatty tergeý múddesine sáıkes jarııa etýge tyıym salynǵan, — dep jaýap berdi vedomstvo ókilderi.

Eske salsaq, osyǵan deıin Prezıdent medıtsına qyzmetkerlerine kúsh kórsetkeni úshin jazany kúsheıtýdi tapsyrǵan bolatyn.