Óskemende aýrýhanada órt shyǵýyna sebepker retinde santehnıkter ustaldy
SEMEI. QazAqparat – Óskemendegi №4 qalalyq aýrýhanada órt shyǵýyna medıtsınalyq mekemeniń santehnıkteri sebepker bolýy múmkin, dep habarlaıdy QazAqparat tilshisi.
6 qazan kúni túngi saǵat 01.00 shamasynda Óskemendegi Serikbaev kóshesinde ornalasqan №4 qalalyq aýrýhananyń jertólesinen órt shyqqan. Oqıǵa ornyna órt sóndirýshiler shuǵyl kelip jetken. Sondaı-aq medıtsınalyq mekemege ShQO ákiminiń orynbasary Shákárim Buqtuǵytov pen qala ákimi Jaqsylyq Omar keldi.
«Dereý aýrýhanadaǵy patsıentterdi evakýatsııalaý bastaldy. Barlyǵy 59 naýqas pen 12 medıtsına qyzmetkeri qaýipsiz jerge kóshirilgen. Zardap shekken eshkim joq. Saǵat 02.30-da 12 sharshy metr aýmaqta jıhazdar men zattardy sharpyǵan tilsiz jaý tolyqtaı aýyzdyqtaldy. Naýqastarǵa qosymsha medıtsınalyq kómek qajet bolmady», - dep habarlady oblystyq Aqparat ortalyǵy.
Aldyn ala málimet boıynsha, órttiń shyǵýyna medıtsınalyq mekemede jumys isteıtin, ishimdik iship alǵan santehnıkter sebepker bolǵan. Qazirgi ýaqytta olar ýaqytsha ustaý ızolıatoryna qamaýǵa alyndy.
