Óskemende áýejaıdyń jabylǵandyǵy týraly aqparat jalǵan, shtattyq rejımde jumys isteýde
Óskemen áýejaıy sońǵy 5 aı boıy jabyq turǵan. Buǵan sonda júrgizilip jatqan aýqymdy rekonstrýktsııalaý jumystary sebep boldy. Qazan aıynda jumystar aıaqtalyp, áýejaıdan qaıta ushaqtar usha bastaǵan edi.
Alaıda kesheli beri BAQ-ta jáne áleýmettik jelilerde áýejaıdyń taǵy jabylǵandyǵy týraly aqparat tarady. Búgin ShQO Óńirlik kommýnıkatsııalar qyzmetinde ótken baspasóz brıfıngi barysynda oblys ákiminiń orynbasary Nurjan Jumadilov bul aqparattyń ras-ótirigin aıtyp berdi.
«Óskemendegi áýejaı shtattyq rejımde jumys istep tur. Qazaqstannyń avıatsııalyq ákimshiligi áýejaıdy paıdalanýǵa ruqsat bergen. Qala turǵyndary men qonaqtaryna Qazaq Air jáne Skat áýekompanııalarynyń ushaqtarymen Nur-Sultan, Almaty, Qaraǵandy shaharlaryna qatynaýyna múmkindik bar. Tek Eır Astana kompanııasynyń ózindik sebepterine baılanysty josparlanǵan birqatar reısteri 6 qazannan bastap jeltoqsan aıyna deıin Semeıdegi áýejaıǵa aýystyryldy», - dep túsindirdi ol.
