Óskemende aýanyń lastaný ındeksi 1,6 esege artqan
ÓSKEMEN. QazAqparat - 2017 jyly Óskemende 84 kún boıy jaǵymsyz meteojaǵdaı qalyptasyp, aýanyń lastaný ındeksi 1,6 esege joǵarylaǵan. Bul týraly Shyǵys Qazaqstan oblysy prokýratýrasynyń keńeıtilgen alqa májilisinde aıtyldy, dep habarlaıdy QazAqparat tilshisi.
«Atalǵan taldaý memlekettik organdardyń qorshaǵan ortany qorǵaý jumysynyń tıimsizdigin, jaýapty uıymdardyń arasynda ózara is-qımyldardyń joqtyǵyn, sondaı-aq, tabıǵat qorǵaý sharalary men tekserýlerdiń ústirt ótkiziletinin kórsetti» - delingen quzyrly organnyń resmı saıtyna jarııalanǵan málimette.
Oblysta 600 iri jáne orta kásiporyn jumys isteıdi. Aýanyń eń kóp lastanýy Óskemen qalasyna tıesili. Munda 2017 jyldyń 84 kúninde qolaısyz meteojaǵdaı tirkelipti. Atmosferaǵa 51,1 tonna las tútin shyǵarylǵan. Negizgi kóz - óndiristik jáne jylý-elektr kásiporyndary, avtokólikter pen qazandyqtar.
«Statıstıka sońǵy 5 jylda aýaǵa tastalatyn las tútinniń azaıǵanyn kórsetkenimen, monıtorıng atmosfera sapasynyń nasharlaǵanyn dáleldep otyr. Mysaly, 2017 jyly lastaný ındeksi 2016 jylmen salystyrǵanda 1,6 ese artqan. Tirkelgen óndiristik tútinniń 70 paıyzy «Qaztsınk» JShS men «AES ÝK TETs» JShS-nyń úlesine keledi» - delingen resmı aqparatta.
Al «Qazgıdromet» mekemesi byltyr Óskemen boıynsha aýa lastanýynyń 435 qaýipti oqıǵasyn tirkep, ekologııa departamentine habarlaǵan. Alaıda, departament lastaý kózderin anyqtaı almaǵan. Sáıkesinshe, eshbir tulǵa jaýapqa tartylmaǵan jáne ekologııalyq ahýaldyń ári qaraı jaqsarýyna qandaı da bir yqpal bolmaǵan.
Qalyptasqan ahýaldy túzeý úshin oblys prokýratýrasy atalǵan salada tekserý júrgizip, qoldanystaǵy zańnamaǵa ózgerister men tolyqtyrýlar engizý týraly usynym jasamaq. Onyń qorytyndysy shilde aıynyń basynda ótetin kezekti alqa májilisinde tyńdalatyn boldy.
