Óskemende aýanyń lastanýynan oqýshylar taǵy mektepke barmaıdy

ÓSKEMEN. KAZINFORM — Óskemen qalasynda erteń birinshi jáne ekinshi aýysymda oqıtyn mektep oqýshylary qashyqtan bilim alady.

2 aqpan kúni saǵat 20.00-ge deıin qalada ekinshi dárejeli qolaısyz meteorologııalyq jaǵdaı saqtalady. Jelsiz aýa raıy jaǵdaıynda zııandy lastaýshy zattar aýada uzaq saqtalady. Osyǵan baılanysty birinshi jáne ekinshi aýysymdaǵy 0-11 synyp oqýshylary onlaın formatqa kóshirildi.

— Aýa raıynyń qolaısyzdyǵy kezinde birinshi kezekte bizdiń oqýshylarymyzdyń qaýipsizdigi mańyzdy. Sondyqtan oqýshylardy ýaqytsha qashyqtan oqytýǵa kóshirý týraly sheshim qabyldandy. Bekitilgen kestege sáıkes onlaın rejıminde sabaqtar ótkizilip, oqý úderisi tolyq kólemde jalǵasady, — dep habarlady qalalyq bilim bóliminen.

Aıta keteıik, qalada osymen 6 kún boıy qolaısyz meteorologııalyq jaǵdaı qalyptasqan. Ekologtar turǵyndardy dalada kóp júrmeýge shaqyrdy.

Eske salaıyq, Óskemende aýaǵa taraǵan eki zııandy zattyń mólsheri shekti deńgeıden asyp ketkeni habarlanǵan.