Óskemende aýanyń lastanýynan oqýshylar qashyqtan oqıdy
ÓSKEMEN. KAZINFORM — Óskemen qalasynda ekinshi dárejeli qolaısyz aýa raıy úshinshi kún qatarynan saqtalyp, birinshi jáne ekinshi aýysymda oqıtyn mektep oqýshylary 30 qańtardan bastap qashyqtan oqytýǵa kóshirildi.
Bul sheshim balalardyń densaýlyǵyna qaýip tóndirýdi azaıtý maqsatynda qabyldandy. Qolaısyz aýa raıy jaǵdaıynda zııandy lastaýshy zattar aýada uzaq saqtalady, al qaladaǵy aýa sapasy turaqsyz bolyp qalady.
— Aýa raıynyń qolaısyzdyǵy kezinde bizdiń birinshi kezekte oqýshylarymyzdyń qaýipsizdigi men ál-aýqaty mańyzdy. Sondyqtan oqýshylardy ýaqytsha qashyqtan oqytýǵa kóshirý týraly sheshim qabyldandy, — dep habarlady qalalyq bilim basqarmasynan.
Bekitilgen kestege sáıkes onlaın rejıminde sabaqtar ótkizilip, oqý úderisi tolyq kólemde jalǵasyp jatyr. Bilim basqarmasy ata-analardan qaladaǵy aýa-raıy jaqsarǵansha mamandardyń habarlandyrýlary men usynystaryn oryndaýdy surady.
Eske salaıyq, Óskemende aýaǵa taraǵan eki zııandy zattyń mólsheri shekti deńgeıden asyp ketti.