Óskemende aýaǵa taraǵan úsh zııandy zattyń mólsheri shekti deńgeıden asyp ketken
ÓSKEMEN. KAZINFORM — Óskemen qalasynda aýaǵa taraǵan úsh zııandy zattyń mólsheri shekti deńgeıden asyp ketkeni anyqtaldy.
Birneshe kúnnen beri qalada atmosferalyq aýada zııandy zattardyń shoǵyrlanýyna qolaıly meteorologııalyq jaǵdaı qalyptasyp otyr.
Eger 6 qyrkúıekte kúkirtsýtek mólsheri shekti deńgeıden 1,475 ese assa, 8 qyrkúıektegi ólsheý nátıjesinde birden úsh zat boıynsha — kúkirtsýtek, kúkirt dıoksıdi jáne kómirtek oksıdi boıynsha normatıvten joǵary kórsetkish anyqtaldy.
Eń joǵary kórsetkish kúkirtsýtek boıynsha tirkeldi. Ol shekti deńgeıden 1,938 ese assa, kúkirt dıoksıdiniń kontsentratsııasy 1,862, al kómirtek oksıdi boıynsha 1,679 ese asyp otyr. Al azot dıoksıdi, azot oksıdi, PM2.5 jáne PM10 ólshengen bólshekteriniń kontsentratsııasy belgilengen shekten aspaǵan.
Erteń de aýa sapasy jaqsarmaıdy. Óskemende 8 qyrkúıek saǵat 20:00–den 9 qyrkúıek saǵat 20:00–ge deıin birinshi dárejeli qolaısyz meteorologııalyq jaǵdaıǵa baılanysty eskertý jarııalandy.
Mundaı meteorologııalyq jaǵdaıda atmosferadaǵy lastaýshy zattar nashar taralyp, jerge jaqyn aýa qabatynda jınalýy múmkin. Qolaısyz meteorologııalyq jaǵdaıdyń eń tómengi — birinshi dárejesi kezinde qala mektepteri shtattyq rejımde jumysyn jalǵastyrady.
Mamandar turǵyndarǵa dalada júrý ýaqytyn qysqartýǵa jáne múmkindiginshe terezelerdi jabyq ustaýǵa keńes berdi.
Eske salsaq, osyǵan deıin ShQO-da ekologııalyq zańnama talaptaryn buzǵan ákimder jaýapqa tartylǵany habarlanǵan.
