Óskemende aýaǵa taraǵan eki zııandy zattyń mólsheri shekti deńgeıden asyp ketken
ÓSKEMEN. KAZINFORM — Óskemen qalasynda aýaǵa taraǵan 2 zııandy zat mólsheri ruqsat etilgen shekten asyp ketkeni anyqtaldy.
«Qazgıdromet» RMK Shyǵys Qazaqstan oblystyq fılıalynyń málimetine súıensek, 21 sáýirde Óskemen qalasynda atmosferalyq aýa sapasyna monıtorıng júrgizildi.
— Sonyń nátıjesinde aýaǵa taraǵan birneshe zııandy zattyń mólsheri shekti deńgeıden asyp ketkeni anyqtaldy. Atap aıtqanda, kúkirt dıoksıdi 1,888 ese, kúkirtsýtektiń mólsheri 1,388 ese asqan. Al keshe kúkirtsýtek boıynsha 1,288 ese, kómirtegi totyǵy boıynsha 1,230 ese asqany tirkelgen bolatyn. Aýa sapasyn baqylaý jumystary jalǵasady, — delingen aqparatta.
ShQO ákimdiginiń habarlaýynsha, Óskemende aýaǵa shyǵaryndylar ónerkásiptik kásiporyndardan bólek, kómirmen jumys isteıtin jylý elektr ortalyqtary men qysta pesh jaǵatyn jer úılerden taralady.
— Búginde qalada 134 myńnan astam avtokólik tirkelgen. Jelsiz kúnderi bul da aýadaǵy lastaýshy zattardyń jınalýyna ákeledi. Qolaısyz meteorologııalyq jaǵdaılar kezderinde kásiporyndar óndiristik júktemeni 20-50%-ǵa tómendetip jatyr, — delingen habarlamada.
Eske salsaq, osyǵan deıin kómir elektr stantsııalarynan zııandy gaz bólinýi 34%-ǵa deıin qysqaratyndyǵy habarlanǵan.
