Óskemende aýaǵa taraǵan eki zııandy zattyń mólsheri ruqsat etilgen shekten asyp ketkeni anyqtaldy
ÓSKEMEN. KAZINFORM — Óskemen qalasynda qolaısyz meteorologııalyq jaǵdaıdyń ekinshi deńgeıi áli saqtalyp otyr.
16 qarasha kúni keshkisin bastalǵan qolaısyz meteorologııalyq jaǵdaı saldarynan zııandy zattar kóshelerde shoǵyrlanyp, qala ishin tútin basqan. Búgin de Óskemende jelsiz kún boldy.
«Qazgıdromet» RMK Shyǵys Qazaqstan oblystyq fılıalynyń málimetine súıensek, ekinshi deńgeıli qolaısyz meteorologııalyq jaǵdaı 18 qarashanyń keshine deıin sozylady dep kútilip otyr.
— Búgin aýanyń lastaný kórsetkishterine monıtorıng júrgizildi. Sonyń nátıjesinde, aýaǵa taraǵan eki zııandy zattyń mólsheri ruqsat etilgen shekten asyp ketkeni anyqtaldy. Naqty aıtqanda, kúkirtti sýtegi ruqsat etilgen deńgeıden 2,6 ese, al kúkirt dıoksıdi 1,373 ese asqan, — delingen aqparatta.
Eske salsaq, osyǵan deıin ShQO-da ekologııalyq talaptardy buzǵan shoshqa fermasy jaýapqa tartylǵany habarlanǵan.