Óskemende aýaǵa taraǵan 3 zııandy zattyń mólsheri shekti deńgeıden asqany anyqtaldy

ÓSKEMEN. KAZINFORM – Óskemen qalasynda aýaǵa taraǵan 3 zııandy zat mólsheri ruqsat etilgen shekten asyp ketkeni anyqtaldy.

«Qazgıdromet» RMK Shyǵys Qazaqstan oblystyq fılıalynyń málimetine súıensek, 2 aqpanda Óskemen qalasynda atmosferalyq aýa sapasyna monıtorıng júrgizildi. Sonyń nátıjesinde, 3 zııandy zattyń mólsheri shekti deńgeıden asyp ketkeni anyqtalyp otyr.

- Naqty aıtqanda, kúkirtsýtektiń mólsheri shekti normadan 4,013 ese, kúkirt dıoksıdi boıynsha 3,8 ese jáne kómirtegi totyǵynyń deńgeıi 1,803 ese asqan. Al 1 aqpanda eki zattyń mólsheri shekti deńgeıden asqany tirkelgen, - delingen aqparatta.

ShQO ákimdiginiń málimetinshe, qala aýmaǵynda bes kún qatarynan saqtalǵan qolaısyz meteorologııalyq jaǵdaılarǵa baılanysty Ekologııa departamentiniń mamandary «Qazgıdromet» RMK jáne sanıtarııalyq-epıdemıologııalyq baqylaý organdarymen birlesip atmosferalyq aýanyń sapasyna kún saıyn kóshpeli monıtorıng júrgizip jatyr. 

Sonyń nátıjesinde, aýa sapasy ortasha deńgeıde jáne óńir turǵyndarynyń densaýlyǵyna qaýip tóndirmeıdi dep baǵalandy. Sonymen qatar jelsiz kúnderde kásiporyndar óndiristik júktemeni 20-40%-ǵa tómendetip jatyr.

Eske salsaq, osyǵan deıin Óskemende aýanyń lastanýynan oqýshylar taǵy mektepke barmaıtyndyǵy habarlanǵan.