Óskemende aýaǵa taraǵan 3 zııandy zattyń mólsheri shekti deńgeıden asyp ketken

ÓSKEMEN. KAZINFORM – Óskemen qalasynda aýaǵa taraǵan úsh zııandy zat mólsheri ruqsat etilgen shekten asyp ketkeni anyqtaldy.

«Qazgıdromet» RMK Shyǵys Qazaqstan oblystyq fılıalynyń málimetine súıensek, 16 aqpanda Óskemen qalasynda atmosferalyq aýa sapasyna monıtorıng júrgizildi. Sonyń nátıjesinde, 3 zııandy zattyń mólsheri shekti deńgeıden asyp ketkeni anyqtalyp otyr.

– Naqty aıtqanda, kúkirt dıoksıdi 2,973 ese, kómirtegi totyǵynyń mólsheri shekti normadan 1,885 ese, al kúkirtsýtek boıynsha 1,688 ese asqan. Bul kúni qalada qolaısyz meteorologııalyq jaǵdaı qalyptasqan. Osyndaı kezde ádette jel soqpaı, aýanyń lastaný deńgeıi joǵary bolady dep kútiledi, - delingen aqparatta.

Aıta keteıik, jelsiz kúnder qalada erteń de jalǵasady. Ekinshi dárejeli qolaısyz meteorologııalyq jaǵdaılar 17 aqpan saǵat 08.00-ge deıin sozylmaq.

Eske salsaq, Óskemende aýa sapasynyń buzylýyna baılanysty oqýshylar erteń taǵy da mektepke barmaıdy.

Osyǵan deıin mańǵystaýlyq ekologter aqqýlardyń ólimine qatysty zertteý nátıjesin jarııalaǵany habarlanǵan.