Óskemende aýadaǵy zııandy qaldyqtardan tamaǵy kúıgen adamdarǵa jańa dıagnoz qoıylýy múmkin

ÓSKEMEN. QazAqparat – Óskemen qalasynda aýadaǵy zııandy qaldyqtardan tamaǵy kúıip qalǵan adamdarǵa jańa dıagnoz qoıylady, dep habarlaıdy QazAqparat tilshisi.

Óndiris oryndary kóptep shoǵyrlanǵan Óskemenniń ekologııasy týraly turǵyndardyń jıi aryzdanatyny belgili. Buǵan deıin aýadaǵy zııandy qaldyqtardan aýyryp, aýrýhanaǵa barǵan naýqastarǵa dárigerler tumaý nemese angına dıagnozyn qoıyp beredi. ShQO Ekologııa departamentiniń bastamasymen endi osyndaı adamdarǵa jańa dıagnoz qoıylýy múmkin.

«Qazirgi ýaqytta Densaýlyq saqtaý mınıstrliginiń saraptama toby «tamaqtyń hımııalyq kúıýi» dep atalatyn aýrýdy dıagnostıkalaý jáne emdeý hattamasyn ázirlep jatyr. Jańa qujatta balalar men eresekterdi emdeýge qatysty bólek usynystar bolady», - deıdi departament basshysy Danııar Álıev.

Onyń aıtýynsha, hattama osy jyly bekitiledi dep josparlanýda.

«Osydan keıin dárigerlerdi, naqty aıtqanda pedıatrlar men terapevtterdi adam aǵzasyna hımııalyq áser etýdiń syrtqy faktorymen baılanysty aýrýdy anyqtaı alatyndaı etip oqytý qajet», - deıdi D.Álıev.