Óskemende aýadaǵy zııandy zattar shyǵaryndysy ruqsat etilgen shekten asyp ketken
ÓSKEMEN. KAZINFORM – Óskemen qalasynda aýa sapasyna qatysty tekserý júrgizgen ekologtar zııandy zattar shyǵaryndysy ruqsat etilgen shekten asyp ketkenin anyqtady.
ShQO Ekologııa departamentiniń mamandary Óskemenniń ár shetindegi atmosferalyq aýa sapasyn baqylaý maqsatynda kóshpeli monıtorıng júrgizdi.
- Jalpy alǵanda, atmosferalyq aýanyń jaǵdaıyna avtokólikter, ónerkásiptik kásiporyndar jáne peshpen jylytylatyn jer úıler áser etedi. Menovnoe kentinde peshterdiń tútinine baılanysty tyǵyz sur tústi bult tirkeldi. Aspaptyq ólsheý jumystary nátıjeleri boıynsha PM2.5 jáne PM10 bólshekteriniń ruqsat etilgen shekten asyp ketý faktisi tirkeldi. Mırnyı, Zaşıta aýdandarynda da osyndaı jaǵdaı baıqalady, - dep habarlady departamenttiń baspasóz qyzmetinen.
Vedomstvo dereginshe, qala arqyly Úlbi men Ertis ózenderi aǵyp ótedi. Sý betterinen qys kezinde shyǵatyn bý qolaısyz meteorologııalyq jaǵdaıda atmosferalyq aýanyń lastanýyn kúsheıtýi múmkin.
Eske salsaq, osyǵan deıin prokýratýra «Almaty Sý» mekemesiniń ekologııalyq zańnama talaptaryn buzǵanyn anyqtaǵany habarlanǵan.