Óskemende aýa sapasynyń nasharlaýyna baılanysty oqýshylar mektepke barmaıdy
ÓSKEMEN. KAZINFORM - Óskemen qalasynda aýa sapasynyń nasharlaýyna baılanysty erteń mektep oqýshylary onlaın formatqa kóshirildi.
24 qazan kúni Óskemende ekinshi dárejeli qolaısyz meteorologııalyq jaǵdaı jarııalanyp otyr. Osyndaı jelsiz kúnderdiń uzaqqa sozylýyna baılanysty erteń qaladaǵy barlyq mektepter qashyqtan oqytý formatyna kóshedi. Bul týraly ShQO Bilim basqarmasynyń baspasóz qyzmetinen málim etti.
- Mundaı sheshim «Qazgıdromet» RMK ShQO fılıalynyń resmı hatyna jáne qala ákimdigi men bilim basqarmasynyń kelisimine sáıkes qabyldandy, - delingen aqparatta.
Eske salsaq, osyǵan deıin óskemendikterge qaladaǵy ekologııalyq jaǵdaıdyń nasharlaǵany týraly eskertý jarııalanǵany, ShQO Ekologııa departamentiniń mamandary aýa sapasyna aspaptyq ólsheý jumystaryn júrgizý úshin birneshe óndiris ornyna jolǵa shyqqany habarlanǵan.