Óskemende aýa sapasynyń buzylýyna baılanysty oqýshylar erteń taǵy da mektepke barmaıdy

ÓSKEMEN. KAZINFORM — Óskemen qalasynda qolaısyz meteorologııalyq jaǵdaı qalyptasýyna baılanysty mektep oqýshylary ekinshi kún qatarynan onlaın formatta bilim alady. 

Qala kóshelerin tumshalaǵan tútin tórtinshi kún qatarynan seıilmeı tur. Osyǵan baılanysty erteń birinshi aýysymdaǵy oqýshylar qaıtadan qashyqtan oqytý formatyna kóshiriledi. 

— Ekinshi dárejeli qolaısyz meteorologııalyq jaǵdaı 16 aqpan saǵat 20:00–den 17 aqpan saǵat 08:00–ge deıin saqtalady. Jeldiń soqpaýy aýaǵa taraıtyn zııandy shyǵaryndylardyń jerdiń tómengi qabatynda shoǵyrlanýyna ákelip soǵady. Sondyqtan oqýshylar ekinshi kún qatarynan úılerinde qalady, — dep habarlady Óskemen qalalyq bilim bóliminen.

Bul sheshim balalardyń kóshede júrý ýaqytyn azaıtyp, qaýipsizdigin qamtamasyz etý maqsatynda qabyldanyp otyr.

Eske salsaq, osyǵan deıin Óskemende mektep oqýshylary qalany tútin basýyna baılanysty qashyqtan oqıtyndyǵy habarlanǵan.