Óskemende aýa sapasynyń buzylyp turǵanyna erteń úshinshi kún

ÓSKEMEN. KAZINFORM – Óskemen qalasynda 4 jeltoqsannan beri qolaısyz meteorologııalyq jaǵdaı qalyptasyp tur.

Qalada 4 jeltoqsannan beri jel soqpaı, kóshelerdi tútin basyp tur. Qolaısyz meteorologııalyq jaǵdaı qalyptasqandyqtan turǵyndarǵa dalada uzaq júrmeı, páterdegi terezeler men jeldetkishterdi jaýyp, qaınatylǵan, tazartylǵan nemese gazsyz mıneraldy sý men sháıdi jıi ishý usynylǵan.

«Qazgıdromet» RMK málimetine súıensek, QMJ erteń de sozylady. Naqty aıtqanda, 6 jeltoqsan saǵat 20.00-ge deıin ekinshi dárejeli qolaısyz meteorologııalyq jaǵdaı qalyptasady. Sondaı-aq Shyǵys Qazaqstan oblysynyń batysynda, soltústiginde, ońtústiginde, onyń ishinde Óskemende tuman túsedi dep boljanǵan.

Eske salsaq, osyǵan deıin jeltoqsan aıynyń sońynda Óskemende birneshe kún boıy qolaısyz meteorologııalyq jaǵdaı qalyptasqany habarlanǵan.