Óskemende aýa sapasyna 2 kún boıy júrgizilgen tekserýler nátıjesi jarııa etildi

ÓSKEMEN. KAZINFORM – Óskemen qalasynda qalyptasqan qolaısyz meteorologııalyq jaǵdaıǵa baılanysty aýa sapasy tekserilip jatyr.

Sońǵy kúnderi qalada jel soqpaǵandyqtan qolaısyz meteorologııalyq jaǵdaı jarııalanǵan. Turǵyndar kóshelerdi tútin basqany jaıly shaǵym túsirgen soń ekologtar 24 shildede tekserý júrgizip, kásiporyndarǵa jospardan tys monıtorıng júrgizgen bolatyn.

Tekserý jumystary 25 shildede de jalǵasty. ShQO Ekologııa departamentiniń zerthanalyq-taldamalyq baqylaý bóliminiń mamandary «Óskemen tynysy» ekologııalyq qaýipsizdik bıýrosymen birlesip, iri ónerkásiptik obektilerdiń sanıtarlyq-qorǵaý aımaqtarynda aýa sapasyna josparly monıtorıng júrgizdi.

Málimetter anyq ári obektıvti bolýy úshin úsh túrli ádis qoldanyldy. Atap aıtqanda, aýadan synama alyp, hımııalyq taldaý júrgizildi, aýa laboratorııalyq jabdyqtardy paıdalana otyryp ólshendi jáne jedel ólsheý qurylǵylarymen ekspress-baqylaý jasaldy. Sonyń nátıjesinde, aýadaǵy zııandy zattardyń ruqsat etilgen shekten asý faktisi tirkelgen joq, - dep habarlady departamenttiń baspasóz qyzmetinen.

Osy rette, vedomstvo ókilderi azamattardy tek resmı aqparat kózderine senýge jáne jalǵan aqparat taratpaýǵa shaqyrdy.

Eske salsaq, osyǵan deıin ekologııalyq máseleler týraly Telegram-bot halyqtyń 22 myń aryz-shaǵymyn qabyldaǵany habarlanǵan.