Óskemende aýa sapasyn baqylaıtyn mobıldi zerthana iske qosylady
ÓSKEMEN. KAZINFORM – Shyǵys Qazaqstan oblysynyń ekologııa departamenti qazan aıynda aýa sapasyn baqylaýǵa arnalǵan zamanaýı mobıldi zerthana satyp almaq.
Bul zerthana qorshaǵan ortanyń lastanýyn naqty ýaqyt rejıminde baqylap otyrýǵa jáne ekologııalyq qaýip-qaterlerge jedel áreket etýge múmkindik beredi.
«Qazgıdromed» RMK málimetinshe, 2025 jyldyń basynan beri Óskemende 69 kún boıy qolaısyz meteorologııalyq jaǵdaı qalyptasqan. Mundaı kezde jel soqpaı, zııandy qospalar aýada qalyp, qalany qalyń tútin tumshalap alady.
Máselen, ótken jyldyń qarashasynda turǵyndar bir aı boıy shahar ishin tútin basqandyqtan dalada dem alý múmkin emestigin aıtyp, shaǵymdanǵan bolatyn. Osydan keıin «Óskemen tynysy» ekologııalyq bıýrosyn qurý týraly sheshim qabyldandy. Al ekologııa departamentin jańa qondyrǵymen qamtamasyz etý – osy bıýronyń alǵashqy bastamalarynyń biri boldy.
– Mobıldi zerthana lastaý kózderin jedel anyqtaýǵa jáne sol jerde birden ólsheý júrgizýge múmkindik beredi. Bul departament jumysynyń tıimdiligin arttyryp, ekologııalyq baqylaýdy barynsha ashyq etedi, - dedi «Óskemen tynysy» ekobıýrosynyń jobalyq keńsesiniń jetekshisi Elena Berezınskaıa-Abılova.
Eske salsaq, osyǵan deıin Óskemen turǵyndarynyń shaǵymynan soń ekologter tekserý júrgizgeni habarlanǵan.