Óskemende aýa sapasyn baqylaý úshin arnaıy komıssııa quryldy
ÓSKEMEN. KAZINFORM – Óskemen qalasynda aýa sapasyn baqylaý úshin arnaıy komıssııa qurylyp, ekologııalyq reıdter júrgizilip jatyr.
Qarashanyń 23-inen beri Óskemende qolaısyz meteorologııalyq jaǵdaı qalyptasyp tur. Soǵan oraı qalada aýa sapasyn baqylaý úshin arnaıy komıssııa quryldy. Onyń quramyna ShQO ekologııa departamentiniń mamandary, qoǵam belsendileri, meteorologtar, sarapshylar men oblystyq máslıhat depýtattary kirdi. Komıssııa músheleri búginnen bastap ekologııalyq reıdke shyqty.
«Ónerkásiptik kásiporyndardyń jumysy jáne olardyń aýany lastaýǵa áseri baqylaýǵa alynǵan. Komıssııa ekologııalyq reıdti «Maı» AQ-nyń sanıtarlyq-qorǵaý aımaǵynda bastap, munda aspaptyq ólsheýler jasady. Nátıjesinde hlordyń shekti ruqsat etilgen kontsentratsııasynyń eki ese asyp turǵandyǵy anyqtaldy», - dep habarlady ShQO Óńirlik kommýnıkatsııalar qyzmetinen.
Sondaı-aq «Qazgıdromet» RMK ShQO fılıalynyń málimeti boıynsha, avtomatty ólsheý stantsııasynda kómirqyshqyl gazy kontsentratsııasynyń ruqsat etilgen shekten asý faktisi tirkeldi. Ózge kórsetkishter qalypty normadan asqan joq.
Eske salsaq, osyǵan deıin Óskemende halyq tunshyǵyp, al sarapshylar aýa sapasynyń monıtorıngi sylbyr júrgiziletinin synaǵany habarlanǵan.
