Óskemende ata-anasynyń qarsy bolýy sebepti jańa týǵan 45 nárestege týberkýlezge qarsy ekpe salynbaǵan

ÓSKEMEN. QazAqparat – Óskemen qalasynda bıyl ata-anasynyń bas tartýyna baılanysty jańa týǵan 45 nárestege týberkýlezge qarsy ekpe salynbady, dep habarlaıdy QazAqparat tilshisi.

ShQO Densaýlyq saqtaý basqarmasy baspasóz qyzmetiniń málimetine súıensek, jyl basynan beri Óskemende 4446 bala dúnıege kelgen.

Onyń ishinde 45 náresteniń ata-anasy perzenthanada BTsJ ekpesin saldyrtýdan bas tartqan. Kóp jaǵdaıda olardyń ekpe saldyrýǵa kelispeýine vaktsınanyń tıimdiligi týraly bilmestigi sebep bolyp otyr.

«Ambýlatorııalyq deńgeıde júkti áıelder arasynda jańa týǵan nárestelerge týberkýlezke qarsy ekpe salý qajettiligi týraly túsindirý jumystaryn kúsheıtý qajet. Eger anasy perzenthanadan shyǵarda balany vaktsınalaýdan bas tartsa, onda emhana deńgeıinde ekpeniń paıdasy týraly úgit-nasıhat jumystaryn jalǵastyratyn dárigerler toptary qurylýy tıis, - deıdi ShQO bas fızıatry Raıfa Safıollınova.