Óskemende Astana qalasynyń kúnderi ótti
ÓSKEMEN. QazAqparat - Astanalyq óner ıeleri jáne mádenıet qaıratkerleri eki kúnge Óskemen qalasyna qonaqqa bardy, dep habarlaıdy QazAqparat Astana qalalyq mádenıet jáne sport basqarmasyna silteme jasap.
Óskemende Astana qalasynyń kúnderi ótti. Óner murajaıynda «Aq tilekpen, Astana!» ekspozıtsııasy eki kún boıy jumys istedi. Ekspozıtsııaǵa eń jarqyn, túrli janrlarda eńbek etetin jáne kórnekti qazaqstandyq 50 sýretshiniń 100-den asa biregeı týyndysy engen. Onyń ishinde S.Smaǵulov, M.Bekeev, R.Qulbatyrov, S.Allabergenov, N.Qarjasov jáne basqalary bar.
Munymen qosa, kórmede Janna Spýnerdiń jeke kollektsııasynan alynǵan eńbekterdi, astanalyq sheberlerdiń músinderi men kartınalaryn kórýge bolady. Elordalyq kórmeni tamashalaýǵa kelgen qonaqtar otandyq qylqalam sheberleriniń shyǵarmashylyq áleýetine, olardyń daralyǵy men kenepte kórinis tapqan qorshaǵan ortany beıneleý ónerine óz baǵasyn berdi.
Sonymen qatar, kórmede sýretshi Ómirbek Tileýlıevtiń «Elim-aı» serııasy kópshilik nazaryna usynyldy. Onyń eńbekteri arqyly qazaq halqynyń ótken ómirimen tanysýǵa bolady.
Q.Qýanyshbaev atyndaǵy Memlekettik akademııalyq qazaq mýzykalyq drama teatrynyń ujymy Shyǵys Qazaqstan oblystyq drama teatrynyń sahnasynda Ulyqbek Esdáýlettiń atyshýly «Zere» dramasyn qoıdy. Spektakldiń qoıýshy-rejısseri - Nurqanat Jaqypbaı, qoıýshy-sýretshisi - Berik Býrbaev. Qoıylymda Óskenbaıdyń báıbishesi, aqyldy keıýana, Abaıdyń ájesi Zere týraly aıtylady. Bir otbasy músheleriniń ózara qarym-qatynasy arqyly avtor qıyn-qystaý zamanda ǵasyrlar toǵysynda ómir súrgen qazaq halqynyń turmys saltyn, aýyrtpalyǵyn jetkizedi. Kórermender tabandylyq tanytyp, qıyndyqtarǵa qarsy tura alǵan, birlesken halyqtyń beınesin bir áıeldiń boıynan kórdi.
Óskemendikter «Zere» dramasynan basqa Muhtar Áýezovtyń «Abaı» tragedııasyn tamashalady. Elordalyq teatrdyń úzdik týyndysy bolyp sanalatyn qoıylymmen ádette, teatr maýsymy ashylady.
Sondaı-aq, Abdýllınder atyndaǵy Shyǵys Qazaqstan óner kolledjiniń sahnasynda Ǵ. Jubanova atyndaǵy memlekettik ishekti aspaptar kvarteti Óskemen qalasynyń turǵyndaryna keremet kesh syılady. «Uly dala áýenderi» kontserttik baǵdarlamasy aıasynda Shýberttiń, Gaıdnnyń, Brodınniń, Jubanovtyń, Jaıymovtyń, Táttimbet pen Qurmanǵazynyń shyǵarmalary oryndaldy.
Munymen qosa, elordalyq shyǵarmashylyq ujymdar «Astanadan aq tilek» Gala-kontsertin kópshilik nazaryna usyndy. Kesh baǵdarlamasynda Astana qalasy Memlekettik akademııalyq fılarmonııasynyń Qazaq orkestri, estradalyq bı, «Shalqyma», halyq bıi ansamblderi, klassıkalyq, estradalyq jáne halyq vokalynyń solısteri óz ónerlerin ortaǵa saldy. Budan basqa, shyǵarmashylyq keshke otandyq estrada juldyzdary da qatysty. Klara Tólenbaeva, Kúlıaım Qaıyrbaeva, Adam, Asqar Jaılaýbaev, Di-ArtStyle trıosy, Baýyrjan Isaev, Rınat Maltsagov jáne Almas Kishkenbaev óz ónerlerin ortaǵa saldy.
Jergilikti muz aıdyny arenasynda shaıbaly hokkeıden «Astana 2009» jáne «Torpedo 2009» komandalary arasynda joldastyq kezdesý uıymdastyryldy.
