Óskemende áskerıler dál Jeńis kúninde 101 jasqa kelgen soǵys ardagerin quttyqtady

ÓSKEMEN. QazAqparat – Óskemen qalasynda QR Ulttyq ulany «Shyǵys» óńirlik qolbasshylyǵynyń áskerıleri dál Jeńis kúninde 101 jasqa tolǵan soǵys ardagerin quttyqtady, dep habarlaıdy QazAqparat tilshisi.

QR UU «Shyǵys» óńirlik qolbasshylyǵy baspasóz qyzmetiniń málimetinshe, Óskemende turatyn Anastasııa Svetocheva bıyl 9 mamyr kúni 101 jasqa toldy.

Jylda týǵan kúnin Jeńis kúnimen qatar toılaıtyn ardagerdi 3477 áskerı bóliminiń komandıri, 5518 áskerı bóliminiń sarbazdary men orkestri jáne «Jas búrkit» áskerı-patrıottyq klýbynyń oqýshylary arnaıy quttyqtap qaıtty. Ǵasyr jasaǵan ardagerdiń aýlasynda soǵys jyldaryndaǵy ánder shyrqalyp, Jeńis kúnin eske aldy.

«Sol kezdegi ánder eshqashan umytylmaıdy. Biz «Katıýsha», «Úsh tankıst» ánderin shyrqaıtynbyz. Bári esimde. Eń bastysy, aspanymyz ashyq bolyp, beıbitshilik bolsyn. Al, jastarǵa densaýlyq, baqyt tileımin!, - deıdi ardager keıýana.

«Otan soǵysy» ordeniniń birinshi dárejeli kavaleri Anastasııa Svetocheva soǵysta áskerı baılanysshy bolǵan. 101 jasqa tolsa da, áli tyń. Soǵystaǵy jerlesteriniń erligi men beıbit ómirdegi tirligin esten shyǵarmaǵan. Tipti, alǵashqy áskerı bıletin kóziniń qarashyǵyndaı saqtap keledi. Soǵys jyldaryndaǵy negizgi urystardyń ýaqyty men ótken jeri de osy kúnge deıin áli esinde.

«Ardagerlerimizdiń arqasynda aspanymyz ashyq, kúnimiz beıbit. Olardyń erligi – biz úshin úlgi, ómirleri – ónege», - deıdi 344 áskerı bóliminiń ofıtseri kapıtan Darhan Muhtarıev.