Óskemende áskerı qyzmetshi kórshisin qutqaryp qaldy
ÓSKEMEN. QazAqparat – Óskemen qalasynda Ulttyq ulan áskerı qyzmetshisi kórshisin qutqaryp qaldy, dep habarlaıdy QazAqparat tilshisi.
Ulttyq ulan «Shyǵys» óńirlik qolbasshylyǵy baspasóz qyzmetiniń málimetine súıensek, baılanys vzvodynyń kishi serjanty Danııar Berlikbaev kórshisin qutqaryp qalǵan. Oqıǵa bolǵan kúni ol kezekshilikten keıin úıinde demalyp jatty.
Tańerteń Danııar kireberiste qaraýsyz júrgen mysyqtardy kórgen. Bul kórshiniń mysyqtary ekendigin baıqaǵan sarbaz oǵan eskertpek bolady.
«Baıqasam, kórshiniń esigi sál ashyq tur eken. Qaǵyp edim, eshkim jaýap qatpady. Esikti ashqanymda edende aýzynan kóbik aǵyp jatqan kórshi áıeldi kórdim. Birden jedel járdemge qońyraý shaldym», - deıdi kishi serjant.
Dárigerler kelip jetkenshe Danııar oǵan alǵashqy medıtsınalyq kómek kórsetip, esin jııýǵa kómektesken. Qazirgi ýaqytta naýqas birinshi qalalyq aýrýhanaǵa jetkizildi.
