Óskemende áskerı bólimnen qashyp ketken sarbaz ustaldy
ÓSKEMEN. KAZINFORM — Óskemen qalasynda merzimdi áskerı qyzmette júrip qashyp ketken sarbaz ustaldy.
QR Qarýly kúshteri Bas áskerı polıtsııa basqarmasynyń málimetine súıensek, áskerı polıtsııa men áskerı qyzmetshiler Óskemen garnızonyndaǵy áskerı bólimderdiń birinde qyzmet ornyn óz betinshe tastap ketken qatardaǵy jaýyngerdi ustady.
— Merzimdi áskerı qyzmetshi A. E. Marhan oblys ortalyǵynan 20 shaqyrym jerde ustalyp, áskerı polıtsııa bólimine jetkizildi. Onyń ómiri men densaýlyǵyna eshqandaı qaýip joq. Atalǵan fakti boıynsha tekserý júrgizilip, oqıǵanyń sebepteri men mán-jaıy anyqtalýda. Aldyn ala málimet boıynsha, sarbaz úıin saǵynyp, qyzmet ornyn óz betinshe tastap ketken, — delingen aqparatta.
Tekserý barysynda áskerı qyzmetshi komandırler jáne birge qyzmet atqaratyn áskerı qyzmetshiler tarapynan jarǵyǵa qarsy keletin qarym-qatynas pen laýazymdyq ókilettikterdi asyra paıdalaný faktileri bolmaǵanyn málimdedi.
Eske salaıyq, osyǵan deıin 23 shilde kúni saǵat 06:30 shamasynda Óskemendegi № 27943 áskerı bóliminiń zymyran-artıllerııalyq qarý-jaraq qoımasynda táýliktik kezekshilikte turǵan áskerı qyzmetshi qoıma aýmaǵynan óz betinshe belgisiz baǵytqa ketip qalǵany habarlanǵan.
