Óskemende ásker qatarynda Túrkistannan kelgen egiz jigit júr
ÓSKEMEN. KAZINFORM – Óskemen garnızonynyń 27943 áskerı bóliminde egiz sarbaz Otan aldyndaǵy boryshyn ótep júr. Ekeýi Túrkistan oblysynan kelgen.
Nurseri men Janseri Jaqsan Túrkistan oblysynyń týmalary. Egizder ásker qataryna shaqyrtý kelgende birge barýdy uıǵarǵan. Sóıtip, ekeýi 27943 áskerı bólimine qabyldandy.
«Bastapqyda rota, batalonnyń ofıtserleri Nurseri men Janseriniń egiz ekenine asa mán bermeı, eki bólimshege bólip jibergen. Keıin egizderdiń birine tapsyrma bergen komandır oryndalýyn ekinshi syńarynan suratqan. Sol kezde ǵana ofıtserler egizder týraly bilip, aǵaıyndardy eki jaqqa bólmeı, bir bólimshege ornalastyrdy», - dep habarlady Óskemen garnızonynyń baspasóz qyzmetinen.
Egizderdiń áskerı boryshtaryn ótep kele jatqanyna jeti aıdaı ýaqyt bolǵan.
«Nurseri men Janseri birge qyzmet etip qana qoımaı, áriptesterine úlgi bolyp júrgen sarbazdar. Olar oqý polıgondarynda, kúndelikti sharýalarda jáne jaýyngerlik tapsyrmalardy oryndaý kezinde árqashan bir-birine arqa súıep, demeý bolyp keledi», - delingen aqparatta.
Dál osy áskerı bólimge taıaýda taǵy bir egizder kelgen. Mádı men Álı Romanovtardyń áskerge kelgen oqıǵasy barlyq jeke quramdy shabyttandyrdy.
«Mádıdiń áskerı boryshyn óteýge attanǵaly jatqanyn estigen Álı oqýynan akademııalyq demalys alyp, onyń sońynan erdi. Egizderdiń birin-biri qoldaýy, bir-birine degen qurmeti men izeti erekshe. Nurseri men Janseri jas sarbazdardy erekshe iltıpatpen qarsy aldy. Bilgenderin úıretip, qamqorlyq ta tanytýda», - delingen habarlamada.
Eske salsaq, osyǵan deıin Qazaqstan men Ózbekstan birlesken áskerı oqý-jattyǵý ótkizgeni habarlanǵan.