Óskemende «Ańsaǵan sábı» baǵdarlamasy arqyly úshem dúnıege keldi

ÓSKEMEN. QazAqparat – Óskemen qalasynda úshem dúnıege keldi, dep habarlaıdy QazAqparat tilshisi.

«Áleýmettik medıtsınalyq saqtandyrý qory» ShQO fılıaly baspasóz qyzmetiniń málimetine súıensek, 9 jyl boıy bala súıe almaı júrgen erli-zaıypty «Ańsaǵan sábı» baǵdarlamasynyń arqasynda úshemniń áke-sheshesi atandy.

«Óskemen qalasynyń turǵyny Jansaıa Ahmadıeva atalǵan baǵdarlamaǵa ótinim berip, áleýmettik medıtsınalyq saqtandyrý qorynan bólingen kvota esebinen EKU jasatty. Bári oıdaǵydaı bolyp, áıel úshem týdy. Onyń ekeýi ul, bireýi qyz», - delingen aqparatta.

Ata-anasy balalaryna Eraly, Erasyl, Zere dep at qoıǵan. Búginde áıel perzenthanadan shyǵýǵa daıyndalýda.

«Uldarym qazirdiń ózinde minezderin, erkelikterin kórsetip jatyr. Al qyzym maǵan tartqan sekildi, uıqysy tynysh, sabyrly», - deıdi Jansaıa Ahmadıeva.