Óskemende anasyna renjigen 14 jasar qyz úıinen qashyp ketken
ÓSKEMEN. QazAqparat - Óskemen qalasynda joǵalǵan 14 jasar qyz tabyldy, dep habarlaıdy QazAqparat.
Óskemen qalalyq polıtsııa basqarmasynyń málimetinshe, keshe tańerteń 14 jasar qyz úıinen ketip qalǵan. Jasóspirimniń anasy birden polıtsııaǵa júgindi.
Onyń aıtýynsha, qyzy buǵan deıin eshqashan úıden qashpaǵan.
«Qalalyq polıtsııa basqarmasynyń jeke quramy shuǵyl qyzdy izdeýge jumyldyryldy», - deıdi Óskemen qalalyq polıtsııa basqarmasy bastyǵynyń orynbasary Oral Ryspaev.
Qyzdyń anasymen áńgimede belgili bolǵandaı, qyzy 8-synypta oqıdy. Taıaýda ekeýi ursyp qalǵan.
Anasy sabaqqa qatyspaǵany úshin qyzyna jekigen. Janjaldan keıin jasóspirim úıden ketip qalǵan.
«Polıtseıler júıeli jumys júrgizdi. Búkil aýlalardy aralap, qyzdyń tanystaryna, týystary men dostaryna jolyǵyp surastyrdy. Qyz áýeli dostarynyń úıinde bolǵan, sodan keıin «úıge qaıtam» dep shyǵyp ketken, alaıda shyn máninde úıge emes, saıabaqqa ketken. Oqýshyny Úlbi polıtsııa bóliminiń qyzmetkeri, polıtsııa kapıtany Erkebulan Maǵzumov tapty. Ol qyzben áńgimelesti. Qazir qyzdyń jaǵdaıy birqalypty, bári durys», - deıdi Oral Ryspaev.
Joǵalǵan qyzdyń 33 jastaǵy anasy polıtseılerge alǵys aıtty. Polıtseıler qyzdyń ata-anasymen de sóılesip, túsindirý jumysyn júrgizdi.
