Óskemende ana men bala ózenge aǵyp kete jazdady
ASTANA. KAZINFORM – Óskemende polıtsııa qyzmetkerleri Úlbi ózeninde qatty aǵysqa ilesip ketken ana men balany qutqaryp qaldy. Bul týraly Polisia.kz habarlady.
17 shilde kúni saǵat 14:20 shamasynda «102» arnasyna qala turǵyny tanysynyń kishkentaı qyzymen birge ózenge shomylyp jatqanyn jáne olardy aǵys alyp ketkenin habarlaǵan. Habarǵa alǵash jedel áreket etken kezekshi kómekshisi Oljas Orazov jaqyn mańdaǵy patrýldik polıtsııa ekıpajyna naqty koordınattar boıynsha baǵyt berip otyrǵan.
- Oqıǵa ornyna patrýldik polıtsııa batalony rotasynyń komandıri Madııar Muhamedjanov basqarǵan №9 ekıpaj shuǵyl jetken. Sol sátte radıobaılanys arqyly habar alǵan Úlbi polıtsııa bóliminiń krımınaldyq polıtsııa bastyǵynyń orynbasary Suńǵat Seıiljanov óz betimen oqıǵa ornyna jetip, birinshi bolyp sýǵa sekirgen. Ana men balany aǵys ózenniń ortasyna qaraı alyp ketken edi, alaıda ofıtser olardy ustap tura aldy, - dep jazylǵan aqparatta.
Kóp uzamaı qarama-qarsy jaǵadan jetken Muhamedjanov kómekke qosyldy. Alaıda aǵys qatty bolǵandyqtan, olar óz betterimen jaǵaǵa shyǵa almady. Polıtseıler qutqarýshylardyń qaıyǵyn kútken. Úılesimdi árekettiń arqasynda qaıǵyly jaǵdaıdyń aldy alyndy.
Qazirgi ýaqytta ana men balanyń ómirine qaýip joq. Oqıǵanyń mán-jaıy anyqtalyp jatyr.
Aıta keteıik, Óskemende joǵalǵan zeınetker dronnyń kómegimen tabyldy.