Óskemende «Altaı - túrki áleminiń altyn besigi» atty halyqaralyq konferentsııa ótip jatyr

Ortalyq mádenıet saraıynda ótip jatqan sharaǵa oblys ákimi Danıal Ahmetov, Qazaqstan Respýblıkasynyń Prezıdent  ákimshiliginiń ishki saıasat bóliminiń meńgerýshisi Aıda Balaeva, Mádenıet jáne sport mınıstrliginiń jaýapty hatshysy Qýatjan Ýálıev, «TÚRKSOI» halyqaralyq uıymynyń bas hatshysy Dúısen Qaseıinov, akademık Ǵarıfolla Esim, túrkolog ǵalym Qarjaýbaı Sartqojauly bastaǵan mártebeli meımandar men sheteldik ǵalymdar arnaıy shaqyrylǵan.
 

Áýeli qonaqtarǵa «Altyn adam» degen taqyryppen sońǵy arheologııalyq qazbalardyń nátıjeleri tanystyrylyp, Shyǵystyń kıeli oryndary týraly kórme usynyldy.

Plenarlyq otyrysta Shyǵys Qazaqstan aýmaǵynda zerteý júrgizip jatqan arheologtar Zeınolla Samashev, Ábdesh Tóleýbekov jáne Karl Baıpaqov úshtigi ǵylymı baıandamalar oqıdy dep kútilýde. Sondaı-aq, Chehııa, Germanııa, Túrkııa jáne Frantsııa ǵalymdary túrki áleminiń Altaıdan bastaý alǵan uly órkenıeti jaıynda asa qundy ǵylymı málimdemeler jasamaq.

Konferentsııanyń negizgi bóliminen keıin qatysýshylarǵa oblystyq tarıhı-ólketaný mýzeıinde «Babalar altyny» degen taqyryppen taǵy bir kórme usynylady. Munda arheologııany damytýdyń óńirlik baǵdarlamasy aıasynda sońǵy 3 jylda tabylǵan 19 myń jádigerdiń eń qundy degenderi kórsetiletin bolady. Konferentsııa qonaqtary Shiliktiden tabylǵan sońǵy «Altyn adamnyń» jańǵyrtylǵan kóshirmesin osy kórmede óz kózderimen kórýge múmkindik alady.

Osy kórmeniń keńeıtilgen nusqasy jýyqta Eýropa elderiniń birinde «Dala ámirshileriniń altyny» degen atpen ótýi múmkin.

Meımandarǵa №46 mekteptiń bazasynda «Meniń mektebim» aktsııasy boıynsha Nazarbaev zııatkerlik mektebiniń úlgisinde tolyq jabdyqtalǵan fızıka, hımııa, bıologııa jáne robot tehnıkasy synyptary tanystyrylady. Konferentsııany oblystyq drama teatrda ótetin ІІІ halyqaralyq «Aq Ertis» klassıkalyq mýzyka festıvali túıindeıdi.