Óskemende Altai Invest-2018 forýmy ótip jatyr
ÓSKEMEN. Qazaqparat - Óskemende 18 eldiń 300 delegaty qatysyp jatqan ınvestıtsııalyq forým ótip jatyr, dep habarlaıdy Qazaqparat tilshisi.
Osymen úshinshi jyl qatarynan ótip otyrǵan forýmda álemge áıgili kompanııalar men ınvestıtsııalyq ortalyqtardyń, qarjy ınstıtýttarynyń ókilderi qatysýda. Olardy óńirge 18 eldiń dıplomatııalyq korpýsy bastap kelgenin aıta ketý kerek. Sharanyń plenarlyq májilisinde Frantsııa, Ońtústik Koreıa jáne Majarstannyń elshileri sóz alyp, Shyǵys Qazaqstan oblysynyń ınvestıtsııa alańy retinde óte tartymdy aımaq ekenin atap ótti.
Forým aıaqtalmaı jatyp, alǵashqy kelissózder óz jemisin berýde. Bul týraly obys ákimi Danıal Ahmetov óz sózinde málimdedi.
«Buǵan deıingi kelissózder nátıjesinde óńir ekonolmıkasyna syrttan 295 mlrd teńgeniń ınvestıtsııasyn tarttyq. Onyń ishinde Eýropa damý jáne qaıta qurý bankiniń úlesi 70 mlrd teńgege jetip otyr. Atalmysh qarjy ınstıtýty qosymsha 150 mlrd teńge quıýǵa daıyn. Sátti júzege asqan kelissózderdiń ishinde túrkııalyq ınvestorlardyń Óskemendegi 300 oryndyq kópsalaly aýrýhana qurylysyn qarjylandyrý jobasyn erekshe ataýǵa bolady. Buǵan deıingi forýmdardyń arqasynda qytaılyq kompanııa Zaısan aýdanynda shaǵyn traktorlar qurastyrýdy qolǵa alǵan bolatyn. Al osy joly segizinshi deńgeıli jylyjaı qurylysyn bastaýǵa kelisip otyrmyz. Ol jylyjaıda jylyna 379 myń tonna kókónis ósiriletin bolady. Keshen janynan 3 myń tonnalyq qoıma da salynbaq» - dedi aımaq basshysy.
Danıal Ahmetov buǵan deıingi forýmdarda kelisim jasalǵanymen, iske asýy kesheýildep jatqan jobalarǵa da toqtaldy.
«Kúrshim aýdanyn Óskemenmen jalǵaıtyn Buqtyrma sý qoımasynyń kópirin salý boıynsha barlyq smetalyq qujattar saraptamadan ótti. Endi Úkimet deńgeıinde sheshimin tabýy tıis máseleler qaldy. Al qytaılyq standart boıynsha jumys isteıtin zerthana birneshe kúnde jumysyn bastaıdy. Bul jobanyń da biz úshin mańyzy zor. Óıtkeni ońtústiktegi kórshimiz biz úshin naryqtyń alyp muhıty» - dedi Danıal Ahmetov.
Qol qoıylǵan kelisimderdiń ishinde «Kórkem-Telekom» kompanııasynyń ınvestıtsııalyq jobasyn da erekshe ataýǵa bolady. Bastapqy kelisim boıynsha atalmysh kompanııa Óskemen, Semeı, Rıdder, Aıagóz, Shemonaıha jáne Zyrıan qalalaryn «Sergek» baqylaý júıesimen qamtýy tıis. Buǵan deıin «Sergek» kameralary Óskemenge qoıylyp kelse, jaqyn kúnderi Semeıge de 4 myńy ornatylmaq.
Oblys ortalyǵyndaǵy qoǵamdyq kólikterdi ekologııalyq jaǵynan sapaly, ekonomıkalyq jaǵynan tıimdi kóliktermen aýystyrý jobasy da ınvestorlar nazaryna usynyldy. Qala kóshelerine zamanaýı avtobýstar shyǵarylǵan soń jol aqysyn elektrondy bılet arqyly tóleý júıesi engizilmekshi. Bul eki jobaǵa da Eýropa damý jáne qaıta qurý banki qyzyǵýshylyq týǵyzyp otyr.
