Óskemende alǵash ret mammologııa ortalyǵy ashylmaq
ShQO ákimdiginiń málimetine súıensek, óńirde onkologııalyq aýrýlardy erte anyqtaý deńgeıi 57 paıyzdy quraıdy. Bul respýblıkalyq kórsetkishten eki paıyzǵa joǵary.
«Skrınıngter men erte dıagnostıkalaý qaterli isikti alǵashqy satyda anyqtaýǵa múmkindik beredi. Bul ólim-jitim men qaterli isik aýrýlaryna shaldyqqandar sanyn aıtarlyqtaı azaıtady. Mundaı nátıjelerge oblystyq onkologııalyq ortalyqtyń zamanaýı jabdyqtalýynyń jáne dárigerlerdiń, ásirese joǵary tehnologııalyq medıtsınalyq kómek kórsetý tásilderin meńgergen hırýrgtardyń biliktiligin únemi arttyryp otyrýdyń arqasynda qol jetkizdik», - dedi oblys ákimi Danıal Ahmetov.
Qazir ortalyq dárigerleri Germanııa men Izraıl elderindegi klınıkalarda gamma-pyshaqpen jumys isteýdi úırenip jatyr. Osy jyldyń sońyna qaraı Shyǵys Qazaqstanda onkologııadaǵy joǵary tehnologııalyq medıtsınalyq kómektiń segiz túri qoldanyla bastaıdy.
«Sonymen qatar Óskemende alǵash ret mammologııa ortalyǵy ashylady. Qazir qajetti jabdyqtar satyp alynýda. Jańa mammograftar Rıdder, Glýbokoe jáne Katonqaraǵaı aýdandaryndaǵy medıtsınalyq mekemelerge de jetkiziledi», - dedi aımaq basshysy.