Óskemende áleýmettik jelini buzý arqyly aqsha suraýshylar paıda boldy
ÓSKEMEN. QazAqparat - Óskemende oqytýshynyń álemettik jelidegi paraqshasyn buzý arqyly stýdentterden aqsha suraǵan alaıaqtarǵa shaǵym tústi, dep habarlaıdy QazAqparat tilshisi.
Alǵashqy shaǵym polıtsııa bólimine 27 mamyr kúni saǵat 16.00-de túsken. Stýdent qyzdan oqytýshysy áleýmettik jeli arqyly qaryzǵa aqsha berýin ótingen. Boıjetken ol ótinishti oılanbastan oryndap, «kaspıı-ámııan» arqyly suraǵan somany jiberedi. Kóp ótpeı muǵalimi taǵy aqsha suraıdy. Qyzdyń kóńiline osy sátte ǵana kúdik uıalap, oqytýshyǵa qońyraý shalady. Al muǵalim óziniń paraqshasyna bireýler buzyp kirgenin aıtyp, artynsha polıtsııaǵa shaǵymdanǵan.
«Qazir osy oqıǵa boıynsha tergeý jumystary júrip jatyr. Kún saıyn «alaıaqtyq» áreketten zardap shekken ondaǵan adam shaǵymdanady. Sonda da bizdiń eskertýlerimiz ben taratqan aqparattarymyzǵa qulaq asatyndar az», - deıdi oblystyq Іshki ister departamentiniń memlekettik til jáne aqparat basqarmasy basshysynyń mindetin atqarýshy Aıgerim Nurǵazına.
