Óskemende áleýmettik nannyń baǵasy qymbattamaıdy

ÓSKEMEN. QazAqparat – Óskemen qalasynda 95 teńgeden satylyp jatqan áleýmettik nannyń baǵasy qymbattamaıdy, dep habarlaıdy QazAqparat tilshisi.

Qala ákimdiginiń málimetine súıensek, qazirgi ýaqytta shahar boıynsha áleýmettik nan pisirýge arnalǵan 1-sortty 100 tonnadan astam un qory bar.

«Áleýmettik nannyń baǵasy 95 teńgeden qymbattamaıdy. Ákimdik pen iri naýbaıhanalar arasynda baǵany ósirmeýge múmkindik beretin memorandým ázirlenýde. Memorandýmǵa qol qoıylǵannan keıin naýbaıhanalar undy belgilengen baǵamen satyp alady», - delingen aqparatta.

Azamattar baǵanyń negizsiz kóterilýine kýá bolǵan jaǵdaıda kásipkerlik bólimine habar berýi qajet. Ol úshin taýardy satyp alǵanyńyz týraly túbirtek nemese baǵanyń qymbattyǵyn dáleldeıtin fotosýret bolýy shart. Sol kezde mamandar tıisti shara qoldanady.

«Eger áleýmettik mańyzy bar azyq-túlikke 15 paıyzdan astam ústeme aqy qosylsa kásipkerge birinshi rette eskertý jasalady. Al bir jyl ishinde taǵy qaıtalansa aıyppul salynady. Shaǵyn bıznes ókiline – 10 AEK, ortashaǵa – 75 AEK, iri kásipkerge – 300 AEK mólsherinde», - delingen habarlamada.

Esterińizge sala ketsek, osyǵan deıin Óskemendegi 3 myń dúkenniń tek 30-ynda ǵana baǵa baqylanǵany habarlanǵan .