Óskemende Aqyt Úlimjiulynyń «Sholaq qol kelinshek» dastany sahnalandy
ÓSKEMEN. QazAqparat - Óskemende qazaq ádebıetiniń aqtańdaǵy Aqyt Úlimjiulynyń dastany negizinde qoıylǵan «Sholaq qol kelinshek» ápsanasynyń tusaýkeseri ótti, dep habarlaıdy QazAqparat tilshisi.
90 mınýtqa sozylǵan qoıylym Óskemendegi oblystyq drama teatrǵa tolǵan kórermendi erekshe áserge bóledi. Toǵysharlyq pen tektilik, izgilik pen zulymdyq taıtalasqa túsken tartysqa toly ápsananyń sıýjeti Altaıdyń ar jaǵynda jasaǵan Aqyt Úlimjiulynyń «Sholaq qol kelinshek» dastanynyń negizinde órbidi.
Kóziniń aldyndaǵysyn ǵana oılaıtyn Qarynbaıdyń, dúnıe-múlik pen rýhanı dáýletke teńdeı kemel Baıtúgeldiń obrazdary arqyly aqyn aq pen qaranyń máńgilik kúresin sheber sýrettegen. Qaıyrshyǵa sadaqa usynǵany úshin qolynan aıyrylǵan sholaq qol kelinshektiń basy qatty, aıaǵy tátti ómiri kórermenniń kóńilin bir sýytyp, bir ysytty.
«Aqyt aqynnyń obrazyn ashý ońaı bolmady, kóp izdendik. Óıtkeni, ol kisiniń shyǵarmashylyǵymen tam-tumdap tanys bolǵanymyzben, ómiri men súrgen ortasy týraly aqparat óte tapshy eken. Aqynnyń rýhanı murasyn zerttep júrgen Astana men Almatydaǵy adamdarǵa júgindik. Astanadan Dáýletkereı Kápuly kitaptarmen qamdap, keńesin berdi. Sonyń negizinde Aqyttyń obrazyn alyp shyqtym. Bizdiń ujym «Sholaq qol kelinshek» ápsanasynyń aýrasyna áli de tereńdep ene túsedi dep oılaımyn» - deıdi akter Qanat Nııazbekov.
Qoıylymnyń rejısseri Saqan Ákeleev oblystyq drama teatrdyń repertýary oljaly dúnıemen tolyqqanyn aıtady.
«Bıyl Aqyt Úlimjiulynyń týǵanyna 150 jyl tolady. Osyǵan oraı, Mádenıet jáne sport mınıstrliginen Aqyt Úlimjiulynyń shyǵarmasyn sahnalaý týraly tapsyrma túsken bolatyn. Monǵolııanyń mádenıet qaıratkeri, aqyn Shynaı Rahmetuly sahnaǵa beıimdegen «Sholaq qol kelinshek» dastanyn oqyp shyǵyp, qatty tebirendim. Aqyt shyǵarmashylyǵynyń shyraqshysyna aınalǵan Gúlnár Omarova men arǵy bettegi Shynaı aǵamyzdyń amanat dúnıesine qııanat jasamaý kerek degen oı keldi. Sonyń arqasynda qysqa ýaqyttyń ishinde tuşymdy dúnıe jasaı bildik degen oıdamyn. Birazdan beri Óskemenniń kórermeni bizdi bulaısha sahnadan jibermeı qoshemettemep edi. Soǵan qaraǵanda premera sátti ótken tárizdi» - deıdi rejısser.
Saqan Ákeleev bul qoıylym tamyz aıynda Almatyda sahnalatynyn aıtady.
«Túriksoı» halyqaralyq uıymyna búkil túrki álemine ortaq aqynnyń dastanyn Túrkııa, Ázerbaıjan elderinde sahnalaýdy usynyp otyrmyz. Monǵolııa, Qytaı elderindegi qazaqtarǵa da tartý etsek degen oıymyz bar» - deıdi ol.
