Óskemende aqpan aıynyń basynan beri 1200-ge jýyq adam kóktaıǵaqtan zardap shekti

ÓSKEMEN. KAZINFORM — Óskemen qalasynda osy aıdyń basynan beri kóshede jaraqat alǵandar sany 1200-ge jýyqtady.

Qalada aýa raıynyń qolaısyzdyǵyna baılanysty kóshede zardap shekkender sany kúrt artty. Aqpan aıynyń basynan beri medıtsınalyq mekemelerge 1 595 adam júginse, onyń ishindegi 1 181-i kóshede qulap, túrli jaraqat alǵan.

Turǵyndar kóktaıǵaqtyń saldarynan trotýarlar men aıaldamalarda júrýdiń qıyndap ketkenin aıtyp shaǵymdanyp jatyr.

— Zardap shekkenderdiń kóbinde býyn shyǵý, aıaq-qoly syný dıagnozdary qoıylǵan. Aýyr jaraqat alǵan 72 naýqas aýrýhanaǵa jatqyzyldy, — dep habarlady Shyǵys Qazaqstan oblystyq densaýlyq saqtaý basqarmasynan.

Osy rette, dárigerler halyqqa kóktaıǵaq kezinde barynsha saq bolýǵa jáne tabany taımaıtyn yńǵaıly aıaq kıim kııýge shaqyrdy.

Eske salsaq, osyǵan deıin kóktaıǵaq saldarynan Pavlodarda 150-den astam adam jaraqat alǵany habarlanǵan.