Óskemende aqpan aıdyń basynan 500-ge jýyq adam kóktaıǵaqtan zardap shekti

ÓSKEMEN. KAZINFORM – Óskemen qalasynda jarty aıǵa jýyq ýaqyt ishinde 500-deı adam kóktaıǵaqtan qulap, jaraqat alǵan.

Qala turǵyndary kóktaıǵaqqa qatysty jappaı shaǵymdanyp jatyr. Aqpan aıynyń basynan beri medıtsınalyq mekemeniń jaraqat bólimine ártúrli jaraqatpen 700-ge jýyq adam júgingen. Onyń 500-ge jýyǵy kóktaıǵaqtan zardap shekti.

-Adamdardyń basym bóligi taıǵaq jerlerde qulap jaraqat alǵan. Qalǵandary jol-kólik oqıǵalary, turmystyq jáne óndiristik jaraqattarǵa baılanysty», - dep habarlady oblystyq densaýlyq saqtaý basqarmasynyń baspasóz qyzmetinen.

Áleýmettik jelilerde dúıim jurt muz basqan trotýarlar, baspaldaqtar men aýla ishindegi ótkelderdiń foto jáne vıdeolaryn jappaı jarııalap jatyr.

-Podezden shyǵýdyń ózi muńǵa aınaldy. Trotýarlar aınadaı jyltyrap jatyr, qum múlde sebilmegen, - deıdi qala turǵyndary.

Halyq kóshelerdi tazalaý tásiline de narazylyq bildirip jatyr.

Olardyń aıtýynsha, arnaıy tehnıka joldy qardan tazartqannan keıin jınalǵan qar men muz jaıaý júrginshiler jolynyń jıegine yǵystyrylyp, qozǵalysqa kedergi keltiredi.

-Tehnıka joldy tazalaıdy, biraq búkil qar men muzdy jol jıegine úıip ketedi. Sonyń saldarynan ne joldyń ústimen júrýge, ne úıilgen qardy basyp ótýge týra keledi, - deıdi zeınetker Ásııa Ibraeva.

Sınoptıkter buǵan deıin aýa temperatýrasynyń kúrt qubylýy kóktaıǵaqtyń paıda bolýyna yqpal etetinin eskertken bolatyn. Qala turǵyndary kommýnaldyq qyzmetter trotýarlardy taıǵaqqa qarsy materıaldarmen óńdeý jumystaryn kúsheıtip, jańa jaraqattardyń aldyn alady dep úmittenedi.

Eske salsaq, osyǵan deıin kóktaıǵaqqa baılanysty Qaraǵandy oblysynyń joldaryna 150 polıtseı tartylǵany habarlanǵan.