Óskemende Ákeler forýmy ótti
ÓSKEMEN. KAZINFORM – Óskemen qalasynda alǵash ret Ákeler forýmy ótti.
Búgingi ákeler kúnine oraı Óskemende Ákeler forýmy ótti. Ondaǵy negizgi maqsat – ákeniń otbasyndaǵy rólin arttyrý. Forýmǵa bilim, quqyq qorǵaý salalarynyń ókilderi qatysyp, urpaq tárbıesinde ózgelerge ónege bolǵan ákeler marapattaldy.
«Shyǵys Qazaqstanda ótip jatqan Ákeler forýmyn qoldaý maqsatynda Astanadan arnaıy keldik. Munda bala tárbıesindegi áke róliniń mańyzy týraly sóz boldy. Bala tárbıesi tek ananyń mindeti emes, ákege de úlken jaýapkershilik júkteıdi. Tarıhqa boılasaq, bul rette ákeniń róli zor. Ýaqyt óte kele naryqtyq ekonomıkanyń áseri me eken nemese basqa da faktorlarǵa baılanysty ma áıteýir ákelerdiń bala tárbıesinen qalys qalǵany baıqaldy. Búgingi forýmǵa qatysqan árbir er adam balasynyń ómirindegi óz ornyn tereń túsinip, oı qorytady dep senemin», – deıdi «Bilim-ınnovatsııa» halyqaralyq qoǵamdyq qorynyń qoǵamdyq baılanystar jónindegi vıtse-prezıdenti Arafat Ábdihalyquly.
Forým barysynda óz otbasyndaǵy tárbıeni ózgege úlgi etip, balalary ártúrli salada jetistikke jetip júrgen óńirdiń ónegeli ákeleri marapattaldy.
«Shemonaıha aýdanyndaǵy Ýba shıpajaıynda áleýmettik salada jumys isteımin. Qosymsha bapker retinde shákirtterdi sportqa tárbıeleımin. Úsh qyzdyń ákesimin. Ekinshi qyzym sport sheberine úmitker, respýblıkalyq týrnırlerdiń bes dúrkin jeńimpazy. Ózge balalarym men shákirtterimniń jetistikterin aıta bersem óte kóp. Jalpy, áke balaǵa meıirimdi, shynshyl, keıde qatal da bola bilýi kerek. Áke qyz balany mahabbatpen, ul balany qas-qabaqpen tárbıeleýi tıis. Bul bizdiń baba ǵuryptan tárbıemizde bar úrdis», – deıdi shemonaıhalyq úlgili áke Jasulan Saıasatqanuly.
