Óskemende Aqan Sataevtyń jańa eki kınotýyndysyna kastıng ótedi
ASTANA. QazAqparat - «Sataifilm» kompanııasy osy ýaqytqa deıin Astana, Qostanaı, Petropavl, Pavlodar, Kókshetaý, Semeı qalalarynda kastıng ótkizip úlgerdi. 29-30 maýsym kúnderi Óskemende ótetin irikteýden keıin kastıng-toby eldiń ońtústigindegi qalalardy aralamaq, dep habarlaıdy «QazAqparat» HAA tilshisi.
Buǵan deıin habarlaǵanymyzdaı, «Qazaqfılm» kınostýdııasy men «Sataifilm» kompanııasy «Kóshbasshy joly. Astana» jáne «TOMIRIS» kórkem fılmderi boıynsha kastıng jarııalaǵan bolatyn. Búgin jáne erteń kınoǵa túsýshilerdi tańdap alatyn top Óskemendegi oblystyq Drama teatrynda (Sátbaev dańǵyly) irikteý ótkizedi. Kastıng saǵat tańerteńgi saǵat 9:00-de bastalady.
Uıymdastyrýshylar irikteýge jasy 16-dan asqan azamattardy shaqyrady. Jeke bas málimetterin casting_satai@mail.ru poshtasyna jiberýge bolady. Atalǵan elektrondy poshtaǵa ózińizdiń boıyńyz, týǵan jylyńyz, baılanys telefonyńyz, salmaǵyńyz, ultyńyz, jumys ornyńyz jáne taǵy da basqa aqparattardy joldaý kerek. Sonymen qatar, fotosýretti de joldaý mindetti. Eń aldyńǵy kezekte teatr jáne kıno akterlary qabyldanady.
Eske sala ketsek, kastıng shilde aıynyń sońynda aıaqtalyp, naqty tańdaý qyrkúıekte jasalady. Akterlyq quram bekitilgennen keıin «Kóshbasshy joly. Astana» fılminiń túsirilimi bastalady. Al «Sataifilm» kompanııasynyń ókilderi tolyq metrajdy, qoıylymy kúrdeli «Tomırıs» fılminiń túsirilimin bastaýdy 2018 jylǵa josparlap otyr.
