Óskemende agroónimderdi arzan baǵamen satatyn saýda ortalyǵy ashylady
ÓSKEMEN. QazAqparat - Óskemende aýyl sharýashylyǵy ónimderin arzan baǵamen satatyn agromarket ashylady. Bul jóninde Shyǵys Qazaqstan oblysynyń ákimi Danıal Ahmetov turǵyndar aldynda jasaǵan esebinde aıtty, dep habarlaıdy QazAqparat tilshisi.
Atalǵan nysan óńirdiń sharýa qojalyqtaryna óz ónimderin tutynýshyǵa deldalsyz, tikeleı ótkizýge múmkindik beredi.
Jalpy, keıingi jyldary shyǵysta aýyl sharýashylyǵy salasynda aýyz toltyryp aıtarlyq jumystar atqaryldy. Sonyń biri - sútpen qamtý. Ótken jyly oblysta 10 sút qabyldaý beketi ashylyp, halyqtan 48 myń tonna sút satyp alynǵan. Al Semeıde ırandyq «AgroPortal» kompanııasy jylyna 30 myń tonna óńdeıtin kombınat, Aıagózde avstralııalyq kompanııa 11,5 myń tonna et óńdeıtin zaýyt salyp jatyr.
«Orynbasarym Shalqar Baıbekovke jyldyń alǵashqy jartysynda aýyl sharýashylyǵy ónimderin kóterme-bólshek baǵamen satatyn saýda ortalyǵynyń tehnıkalyq-ekonomıkalyq negizdemesin ázirleýdi tapsyramyn» - dedi ShQO ákimi.
