Óskemende aǵashtan salynǵan mýzeı órtendi
ÓSKEMEN. QazAqparat - Óskemende aǵashtan salynǵan mýzeı ǵımaraty órtendi. Jalyn 525 sharshy metr aýmaqty sharpydy, dep habarlaıdy QazAqparat.
Shyǵys Qazaqstan oblystyq Tótenshe jaǵdaılar departamentinen málim etkendeı, órt týraly tús kezinde «101» nómirine oqıǵa kýágerleri habarlaǵan. Tilsiz jaýmen kúreske 50 órt sóndirýshi men 20 tehnıka jumyldyryldy.
Aldyn ala málimet boıynsha, órt ǵımarattyń shatyrynan bastalǵan.
Mýzeı qyzmetkerleri barlyq aǵash eksponattardy ǵımarattan shyǵaryp úlgergen.
«Órt saǵat 15.30-da tolyǵymen sóndirildi. Jalyn sharpyǵan aýmaq 525 sharshy metrdi qurady. Oqıǵa sebepteri anyqtalýda», - dep atap ótti oblystyq TJD-dan.
