Óskemende aǵash óńdeıtin kásiporynnan shyqqan órt sóndirildi
ÓSKEMEN. QazAqparat – Óskemen qalasynda aǵash óńdeıtin tsehtan shyqqan qyzyl jalyn aýyzdyqtaldy, dep habarlaıdy QazAqparat tilshisi.
ShQO tótenshe jaǵdaılar departamenti baspasóz qyzmetiniń málimetine súıensek, saǵat 16:00 shamasynda Chıstıakov kóshesinde ornalasqan aǵash óńdeıtin tsehta órt shyqqan.
Tilsiz jaý ǵımarattyń shatyry men ishtegi jabdyqtardy sharpydy.
«Tseh jumysshylary 20 mınýt boıy órtti óz kúshterimen sóndirmek bolǵan. Sonyń saldarynan jalyn jan jaqqa tez tarap ketti. Oqıǵa ornyna 13 birlik tehnıka men 50-den astam qutqarýshy jumyldyrylǵan. Saǵat 18.39-da 480 sharshy metrdi aýmaqty sharpyǵan tilsiz jaý aýyzdyqtaldy» dep habarlady vedomstvo ókilderi.
Aldyn ala málimet boıynsha, órttiń shyǵýyna elektr jabdyqtaryn montajdaý jáne paıdalaný kezinde órt qaýipsizdigi talaptarynyń saqtalmaýy sebep bolǵan.
Zardap shekken eshkim joq.
Esterińizge sala ketsek, osyǵan deıin Óskemende aǵash óńdeıtin tsehtiń órtenip jatqany habarlanǵan.
